១.ឧិព្រហ្មចារីស្រីវ័យក្រមុំ ថ្ងៃដែលបងសុំមាសមុំរៀបការ
ម្តាយអូនផ្គាប់បងជាប្រាក់ដុល្លារ ថ្លៃណាស់ជីវាបងគ្មានគ្រប់ទេ។
២.ឧិព្រហ្មចារីស្រីក្រមុំក្មេង ក្លាយជាហាងឆេងផ្សារលក់កេរមេ
គេទិញគេលក់តាមតែចិត្តគេ បងរេរិះគិតសែនអនិច្ចា។
៣.ឧិព្រហ្មចារីស្រីស្ទើក្រមុំ ថ្លៃណាស់ស្រីមុំម្តាយអូនគាត់ថា
តែអូនឥតស្តាយចាយឲ្យសង្សារ បំពេញតណ្ហាដោយឥតគិតថ្លៃ។
៤.ឧិព្រហ្មចារីស្រីមាសបងអើយ ម្តេចឡើយឲ្យគេផុយម៉្លេះចរណៃ?
ផ្គាប់ចិត្តគេជួញដូរយកកម្រៃ កែច្នៃលៃលកយកជាដុល្លារ។
៥.ឧិព្រហ្មចារីដ៏ប្រពៃពិត មាសមិត្តអាណិតគិតពិចារណា
ឈប់លក់ដូរទិញដូចត្រីក្នុងផ្សារ កុំឲ្យសង្សារបំផ្លាញស្រីថ្វី។
៦.ខ្ញុំនិយាយនេះមិនមែនបន្ទោស កុំដាក់ទោសខ្ញុំដែលចំណេះខ្ចី
ព្រោះដ្បិតរូបខ្ញុំមិនមែនកវី អ្វីៗខ្ញុំស្តីមិនមែនសប្បាយ។
៧.អភ័យទោសផងបើខុសឆ្គង កុំសំពងខ្ញុំដែលមកពីឆ្ងាយ
ខ្ញុំកូនអ្នកស្រែរស់កម្សត់កាយ ខ្ញុំពោលព្រោះស្តាយរសព្រហ្មចារី។
ដោយ៖ ខ្មែរស្មេរ
0 ចូលរួមបញ្ចេញមតិនៅទីនេះ:
Post a Comment