បានជួបស្រស់ស្រីសំដីទន់
មុខមូលមានមន្តស្រូបព្រលឹង
ខាបឆក់បេះដូងអោយគាំងឈឹង
អារម្មណ៍ធ្មាំងធ្មឹងរឹងជើងដៃ។
ចង់ នៅជួបជិតកិតកៀកកាយ
ចង់ រស់រៀងអាយអែបចរណៃ
ចង់ ចាំចរចាទាំងយប់ថ្ងៃ
ចង់ ចងនិស្ស័យស្នេហ៍សំងាត់។
ចង់ ពួនពេបយំព្រោះនឹកស្រី
ចង់ ស្តាប់សំដីបីបួនម៉ាត់
ចង់ បានចំលើយស្បើយវិបត្តិ
ចង់ ណាស់ចង់ណាត់ជួបពីរនាក់។
ចង់ យល់ពីពៅអោយបានច្បាស់
ចង់ ស្រែកប្រកាសចិត្តជំពាក់
ចង់ ពោលពាក្យពិតឥតលៀមលាក់
ចង់ រាប់រាក់ទាក់សើចក្អាកក្អាយ។
បានត្រឹម តែចង់ឥតសង្ឍឹម
បានត្រឹម ញញឹមឥតសប្បាយ
បានត្រឹម ខកចិត្តឥតរសាយ
បានត្រឹម តែស្តាយ! ស្តាយសោយសោក!!!
កំណាព្យបទពាក្យ៧ ដោយ ជ័យ ចាប ជ័យលាភីតែងនិពន្ធក្របខ័ណ្ឌអាស៊ានឆ្នាំ២០០៤
0 ចូលរួមបញ្ចេញមតិនៅទីនេះ:
Post a Comment